«Նժդեհյան ցեղակրոն» կուսակցության խորհրդի անդամ Զոհրաբ Պետրոսյանն այսօր լրագրողների հետ հանդիպման ժամամանակ նկատեց, որ իրենք գիտեն այն տնտեսական, սոցիալական և քաղաքական խնդիրները որոնք կան Հայաստանում և կարծում են, որ դրանց լուծման միակ եղանակը ազգային արժեհամակարգի ներմուծումն է հայ ժողովրդի մեջ:
Արտաքին քաղաքականության բնագավառում իրենց մարտավարության մասին խոսելով, Պետրոսյանը նշեց, որ իրենց գաղափարախոսության գլխավոր թեզը ազգն է և ազգի շահը գերակա դասելը. «Արտաքին քաղաքականության մեջ մենք պետք է առաջնորդվենք հենց այդ սկզբունքով` մենք պետք է կառուցենք արտաքին քաղաքականությունը ազգային անվտանգության և շահի սկզբունքից ելնելով»:
Ներկայացնելով ԼՂ խնդրի վերաբերյալ իրենց կուսակցության դիրքորոշումը, Պետրոսյանը նշեց, որ իրենք չեն տիրապետում բանակցային գործընթացին, քանզի դրա մասին հանրությանը տեղեկություններ չեն հասնում: Այդուամենայնիվ, «Նժդեհյան ցեղակրոն» կուսակցությունը ողջունում է այն սկզբունքները, որոնց շուրջ գնում են բանակցությունները:
«Արցախի խնդիրը զուտ արտաքին քաղաքականության խնդիր չէ: Արցախը պատմական Հայաստանն է և մենք խնդիր ենք դնելու Հայաստանի ազգային պետության ստեղծման: Սա նաև ներքին խնդիր է»,- մանրամասնեց Պետրոսյանը:
Նա նաև նկատեց, որ հայտարարվում է փոխզիջումների մասին, սակայն հստակ չի ասվում թե ինչ ի նկատի ունեն դրա տակ, ինչպես նաև անորոշ է ինքնորոշման հարցը:
|